MalasayachLink

ሽሒድ ሐሺም ኢድሪስ:አላሁ መርሂም

አላሁ መርሂም ይሎ ጩቅቲ: ቅጤ በንኣደሙም አሀድ አያም ይጤራህባዛል: ዘይቂር ፈርዲንታ:: ይቤም:: ሚያዚያ 7, 2003 ቤ ይ ፈርዲ ዚታ ኑግዳ ሽሒድ ሐሺም ኢድሪሱውም ገበዕ ባየው:: አህ የትሺ:: ሙት የትሂጪ  አለጋንታ:: የኽኒማም ሽሒድ ሐሺም ኢድሪስ ሙትሶ መትሄጫቤም ሁሉፍ ቃምቤ ዛል በሰሩው ቃብ ያሽዛሊንታ::ሽሒድ ሐሺም ኢድሪስሌ ሐረሪ ኡማትዋ አላይ ቀቢላም በካሌው:: አዜብዋ ራጋዞም ኢብዕዞው ኩሉል አሻሌው:: አኑም ሂኒቅቤ ኢበኪላቤ ሀልኹ:: ሆጂም ጊሹም ኢባክላኻኽ ሐሺሞው! አላሁ መርሂሙም ኢላኻኽ::

ሽሒድ ሐሺም ኢድሪስ: ሀራት ኩቱፍ ወልዳችሌ አውታ::የቲም ወልዲ ሀደጋ:: ሽሒድ ሐሺም ኢድሪስ: አጢዞም የትም ዚናርማ: አባዋ ኢሃችሶውም ደበል ዲባያቤም አይዞውም ዩጡሪ ዚናርማ ጋርሌ መኻዙ ዚናር አቦቻችሌም ኩም አቦች ዚናር ሽሒድ ወጣኒ ናር::

ሽሒድ ሐሺም ኢድሪስ ሐራሪ በንደር ጋርቤ: ደቺዋ ሚራሱው ይነኪ ኢዳራቤ ይደልጊ ዚናርማ: አሀድ አያሙም ጉቦ (ጥንጣን) ዘላሬቄው:: መስኪኑው ይኻድሚ ዚናር መላሳይ: ኡመት ሀራቂን ናር:: አስማዕዲን በሪ ኢስቲማጋዳ ቤሔርሌም: ደቺ መሴአድሳዕ: መስኪንዋ ሐቅ ዘላያቹው ዘቃዳማማ: ከርሳምዋ ጠላፋ ሐራሪ ሊግ ኤቃዳችዋ አህላችሲዩው ወጊድ ዛያ አቦች ባድ ወዳዳ ናር:: አላሁ መርሂም:: ሱት ጀነትሶው የስጣ::

ሽሒድ ሐሺም ኢድሪስ:አሀድ ኡሱኡውም ዘልዳራአማ ዘለቄሻ: ሐያትዋ ሁሽመትዞሌም በንደር ዚኬበሌው: ሐቅሌ ዚቃናናማ ዙልሚው ይትማሀጥ ዚናር ወጣኒ ባድ ወዳዳ ሐራሪ ናር:: አሀድ ኡሱቤም አልቦራዳም:አሀድ ኡሱውም ሲናን አልፋጫም:: ነካኦግርሞኽ: ሀራስ ጋንጎራነትዞው ያር ዚናር ስዋር መለሳይ ናር::

ሽሒድ ሐሺም ኢድሪስ ኤሔሬይ: ሚንሌ ማልቱ ደቺቤ ኡሱዞ ኤቃድቤ ተጋዳላ?? ሀቅሌ ዚቃናናማ ጥንጣኑው ሐሻዕ ዛያሌሞ ? ሐራሪ መአሀድ ሊግዋ "ኮርማ ኢስታዩ ኢኒስቲ" ዚኻኑ ካቦያችዚዩው ቦርታ የቦባኹ ዛያሌንታ? ይሌ ኡስሁሉ ጀዋብዞው ኢብቃዛኽ ባድ ወዳድ ሐራሪ መላሳያችቤንታ ቢላይ : ከርሲ አስብህ:: ኡሩስ መቃጡ:: ጥንጣን ወሀጣ: ዚታዩ ሊግ ኤቃዳችዋ አግቡራችዚዩቤም አልታ::

ሽሒድ ሐሺም ኢድሪስ ደምዞ ይከልሀል!! አኑም ዱኹጥ ሐራሪ ኡማትሌ ሉኼው አስሚማ:: ሐሺም ኢድሪስ ደምዞ ዲያው መግኛሌ ኦርቲዋ ማልቱም ኢካልሀኽ:: ሐቄው አሀድ ኡሱኡም ይስጣኙሜል:: አን ኢፋጭባዛኽኩትቤ ኢፋጫኽ:: ሀሊዋ : ሄላዞም አንቤ ሀል :: አላሁ የደበልባማ ቁራ ወቅቲቤ ታኸዋ ዲናቴውም አኩኢማ ሐራሪ ኡማት ሀቅዋ ሽሒድ ሐሺም ኢድሪስ ሀቁው ኢፋጫኽ:: አላዋ ነቢ ከራማቤ:: ኡማዋ ባባቼ ዱዋዕዋ ከራማቤ ኢግዝማው ኢረኽባኽ::

አብሺር በል ሀራቄ ሐሺም ኢድሪስ:: ወልዳችኻው ወልዳቼኩትቤ:: ጋራችኻው ጋራቼኩትቤ::አይኻው አየኩትቤ:: ኢህዋ ኢህታችኻው: ኢህዋ ኢህታቼኩትቤ: ሀያቴቤ ኢሳልኹ አንዋ አኑው ዚመሳሉ ሐራሪያችባህ ሜጠቅዚዩቤ ኒቃኒዛናነትሌ አላሁ ሱምቤ አህዲ ኑቡላኻና::

ሀራቄ ሐሺም ኢድሪስ: ሀልዋ አመልኻቤ: ኦር ኡሱዕነትኻቤ: ኡማቴው አማና ባኻና::አላሁ አማና ይቂህሪዛሉ ሐራሪ ወናጋች ዩሻና:: አሚን::

ዚሞታ ዋጂብዞው ከፋላ:: ሽሒድ ሐሺም ኢድሪስሌ ሱት ጀነትሶው ሙባህ ዩሽላ:: አኺራ ጋርዞው አሩዝ ጋርኩት አላሁ ኢዝኒቤ ጃህጃህ ዩሽላ:: አሚን: አላሁማ አሚን::

ሐሺም ኩዳይ!! ሳሳ ጁዝ ቁርዓን ሀዲያኤ የቦርዳኽ:: ኣላሁሌ አማና::